Эне тилге эки мүнөт: "Адамдын тагдырын чакмак алган эски бийлик эбак кыйраган". Чакмак алуу дегенди сиз кандай түшүндүңүз?

"Эне тилге эки мүнөт" рубрикасынын бул жолку чыгарылышында фразеологизм сөздөрүнүн маанисин эл аралык Кувейт университетинин лингвистика жана социалдык гуманитардык илимдер кафедрасынын доценти Гүлнур Жамалбекова түшүндүрүп берди.

1. Чакмак алуу - бирөөгө өз билгениндей үстөмдүк жүргүзүү, ары-бери калчоо, көз каранды кылуу. Мисалы: Адамдын тагдырын чакмак алган эски бийлик эбак кыйраган. (Т.Сыдыкбеков)

2. Ажат ачуу - бирөөнүн өтүнүчүн, тилегин орундатуу, муктаждыктан куткаруу, керегине жароо. Мисалы: Ажатын ачтың муңдагы ата менен эненин. (Калык)

3. Апкөй тил - бал тилге салып, куулук көрсөтүүнүн, алдоонун амалы. Мисалы: Байымбет бу саам апкөй тил, азем мамиленин түпкүрү көк иримдүү экенине көзү жете камсыкты. (Ш.Бейшеналиев)

4. Каны ичине тартуу - ачуусу келүү, каардануу, кубарып-кумсаруу, кыжыры кайноо. Мисалы: Каныбектин каны ичине тартып, тиштери качырап, жаак эттери түйүлө баштады. (К.Жантөшев).

Автор: Гүлдана Мамадали кызы