Эне тилге эки мүнөт: "Териси тар болсо, бая эле кырс этип кабагын салып калат эле". Териси тар дегенди кандай түшүндүңүз?

"Эне тилге эки мүнөт" рубрикасынын бул жолку чыгарылышында фразеологизм сөздөрүнүн маанисин эл аралык Кувейт университетинин лингвистика жана социалдык гуманитардык илимдер кафедрасынын доценти Гүлнур Жамалбекова түшүндүрүп берди.

1. Териси тар - сөз көтөрүмү жок, бир нерсеге бат мурчуйган, ачуусу чукул. Мисалы: Териси тар болсо, бая эле кырс этип кабагын салып калат эле. (Т. Сыдыкбеков)

2. Ак-сары башыл - кокустуктан, катуу кырсыктан аман-эсен калганда Кудайга жалынып, мал атап өткөрүлүүчү түлөө, курмандык. Мисалы: Берекетти аракет менен таба турган дыйкан эле, кыбыланы карап, кудай жолуна ак-сары башыл атап союшуп, кудайдан ырайым тилешип, шак кыркын басып киришти. (Т. Касымбеков)

3. Ит арка - бир пикирге келишпегендик, ыйкы-тыйкы, чыр-чатакка келүү. Мисалы: Биз алар менен ит арка болуп кирип-чыгышпай калдык. ("Чалкан").

Автор: Гүлдана Мамадали кызы