Чүй облусунда демөөрчүлөр тарабынан курулган билим берүү комплекси мамлекеттин балансына өткөрүп берилди

Чүй облусунда Кыргыз Республикасынын балансына демөөрчүлөр тарабынан курулган билим берүү комплекси мамлекеттин балансына өткөрүп берилди. Бул тууралуу өкмөттүн басма сөз кызматынан билдиришти.

Маалыматка ылайык, 31-октябрда Сокулук районунун Кызыл-Туу айыл өкмөтүндөгү Токбай айылында комплексти Билим берүү жана илим министрлигинин балансына өткөрүү боюнча иш-чара болуп өттү.
2018-жылы "Ас-Салам" кайрымдуулук фонду Кувейт мамлекетинин демөөрчүлөрүнүн эсебинен Токбай айылында билим берүү комплексин салган. Алгач бул жерде жетим балдар окутулары каралган. Бирок 2 жыл аралыгында ар-кыл бюрократиялык себептерден улам комплексти мамлекетке өткөрүп берүүгө мүмкүн болгон эмес.
Мындан бир канча күн мурда "Ас-Салам" фондунун директору Нурмухамед Миңбаев президенттин милдетин аткаруучу, премьер-министр Садыр Жапаровго аталган маселе менен кайрылып, ал аркылуу маселе ыкчам чечилген.

Жакынкы мезгилде аталган комплекс кесиптик-техникалык билим берүү мекемеси катарында пайдаланылары болжолдонууда.

Автор: Жылдыз Джускембаева