Башкы прокуратура: "Беларусь мамлекети Курманбек Бакиевди жана анын туугандарын өткөрүп берүүдөн баш тарткан"

Башкы прокуратура Беларусь өлкөсү мурдагы президент Курманбек Бакиевди жана анын туугандарын Кыргыз өлкөсүнө өткөрүп берүүдөн 4 жолу баш тартканын билдирди. Бул тууралуу аталган мекеменин эл аралык укуктук кызматташтык башкармалыгынын башчысы Асылбек Акматов билдирүү жасады.

"Бакиевдерди өлкөгө өткөрүп берүү боюнча Беларусь мамлекетине 2011-жылдан тарта 4 жолу билдирүү жөнөтүлгөн. Алар саясий куугунтуктоолор болуп жаткандыгын айтып, Кишинев конвенциясына таянуу менен баш тартышкан", - деди ал.

Бүгүн, 4-ноябрда өлкөнүн башкы прокурору Курманкул Зулушев маалымат жыйын өткөрүп, анда бир катар суроолорго жооп берди.

Автор: Бактыгүл Момбекова