Москва-Бишкек аба каттамында учуп келген 79 жүргүнчүнүн жүгү Орусияда калыптыр

1-октябрда Москвадан Бишкекке "Урал Транс" авиакомпаниясынын учагы менен учуп келген 79 жүргүнчүнүн жүгү Орусияда калыптыр. Бул тууралуу бизге жүргүнчүлөрдүн бири Майрамкүл Озураева билдирди. "Урал Транс" авиакомпаниясында Кыргызстанга билет арзан болгондуктан көпчүлүк кыргыздар ушул компания аркылуу учушат. Билетте 30 килограммдан ашык жүккө кошумча акча төлөнөрү жазылганын белгилеп: “Биз 3 кишиге билет алганбыз. Жүгүбүз көп болгондуктан башка адамдардын жардамы менен текшерүүдөн өткөрүп алдык. Учакка отурган терезеден жүктөрдүн кайра учактан түшүрүлүп жатканын кызым көрүп өзүнүн баштыгын таанып калды. Биз стюардессалардан сураганда айтпай коюшту”,- дейт Озураева. Учак Москвадан саат 09:55те учкан. Кызматкерлер учакка батпай калган жүктөр саат 12:00дөгү каттам менен артыбыздан келерин айтышкан. Кыргызстанга келгенде текшерүүдөн өткөндө 79 кишинин жүгү келбей калганы маалым болду. “Саат 12:00дө уча турган учакты күттүк, ал Кыргызстандын учагы экен. Биздин жүктөрдү алып келбептир. Ызы-чуу салганыбызда "Урал Транстын" өкүлү жүргүнчүлөр менен жакалашканга чейин барды. Биз жүктөрүбүздү күтүп кечки саат 10:00гө чейин жүрдүк”,-деп кошумчалады. Жүргүнчүлөр ИИМдин атына арыз жазып тарап кетишиптир. Ал эми Кыргызстандагы "Урал Транс" авиакомпаниясына байланышсак, бул окуя боюнча эч кандай маалымат бер албай тургандыгын билдиришти.

Автор: Айпери Ганыжан кызы