Президенттин Жогорку Кеңештеги өкүлү депутаттардын сынына жооп кайтарды. Премьер-министрдин иниси кызматынан бошотулду. Күн ичинде орун алган саясий окуялардын топтому бир шилтемеде

Бүгүн, 4-февраль, күнгө бейшемби. Саясий окуялардан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.

Президенттин Жогорку Кеңештеги өкүлү депутаттардын сынына жооп кайтарды

Бүгүн, 4-февралда Жогорку Кеңештин жыйынында депутат Дастан Бекешев камактагы мурдагы ички иштер министринин орун басары Курсан Асанов эч жакка качпай турганын айтып, аны үй камагына чыгаруу керектигин белгиледи.

"Ал басып алуу үчүн камалса, анда ошол күндөрү ар кандай мамлекеттик объектилерди басып алгандардын бардыгы камалсын. Курсан Асанов бул жерде депутаттар менен он жыл иштеген. Ал эч жакка качпайт. Аны үй камагына чыгарыш керек", - деди депутат.

Ал эми депутат Ирина Карамушкина азыркы бийликти мурунку бийликтин каталарын кайталабоого чакырды.

"Өлкөдө жаңы бийлик орнотулду. Көпчүлүк жарандар көп нерсени күтүп жатышат. Бирок президенттикке талапкерлигин койгон атаандаштары Абдил Сегизбаев менен Курсан Асановдун камалышы саясий куугунтук уланып жатканын билдирет деп ойлойм. Эмнеге дагы деле Фарид Ниязов камакта отурат? Кечээ Абдил Сегизбаевдин штабында иштегендер сурак берди. Муну басым деп айтса болот. Мурунку бийликтин катасын кайталабоого чакырам", - деди ал.

Президенттин Жогорку Кеңештеги өкүлү Анарбек Калматов депутаттардын бийликти сындаганы боюнча жооп кайтарды.

"Азыр ушул залда 3 депутат кайрылды. Президенттин, өкмөттүн өкүлүнө кайрылгандан кийин аларды дагы угуш керек. Ирина Карамушкина азыркы бийлик, УКМК басым кылып жатканын билдирди. Абдил Сегизбаевди мыйзамсыз камакка алды деп айтты. Кантип бир документти көрбөй минтип айтат. Мына Дастан Бекешев Курсан Асановду үй камагына чыгарып койгула деп жатат. Сотторго буйрук бергенге эч кимибиздин акыбыз жок да. Бизди президент инаугурациядан кийин чогултуп, таза иштегенге чакырды. Ким мыйзамды бузса ал түрмөгө жөнөтүлөт деп айтты. Бардык чечимдер мыйзамдын негизинде жүргүзүлөт", - деди Калматов.

Сайдулла Нышанов "Ата Мекен" партиясынын катарынан чыкты

Жогорку Кеңештин жыйынында депутат Сайдулла Нышанов "Ата Мекен" партиясынын катарынан чыгып жатканын жарыялады.

"Ушул боюнча билдирүү жасап коёюн дедим эле. Ал эми депутаттык ишимди, фракциядагы иштерди жүргүзө берем", - деди ал.

Нышанов журналисттерге партиядан чыгышына саясий уюмдагы кээ бир адамдар менен келише албай калганы себеп болгонун айткан.

Сайдулла Нышанов 2015-жылы "Ата Мекен" партиясынын тизмеси менен Жогорку Кеңештин депутаты болуп шайланган.

Жаңы премьер-министрдин иниси кызматынан бошотулду

Премьер-министр Улукбек Мариповдун бир тууган иниси Бакытбек Марипов Ноокат районунун акими кызматынан бошотулду. Бул тууралуу өкмөттүн маалымат кызматынан билдирди.

Маалыматка ылайык, буйрукка премьер-министр Улукбек Марипов кол койгон.

Чечим Конституциянын 89-беренесинин 7-пунктуна ылайык, кызыкчылыктардын кагылышын жокко чыгаруу максатында кабыл алынды. Себеби Бакытбек Марипов учурдагы өкмөт башчынын бир тууган иниси болуп саналат.

Мыйзамга ылайык, жергиликтүү бийлик органдары аткаруу бийлигинин бир бөлүгү болуп саналат жана түздөн-түз премьер-министрге баш иет.