Райымбек Матраимов 2 айга камакка алынды

Биринчи Май райондук сотунда Райымбек Матраимовдун баш коргоо чарасы каралып, ал 2 айга камакка алынды. Бул тууралуу журналисттерге анын жактоочусу Мадина Ниязова билдирди.

Аны колдогондордун митинги уланууда. Алар нааразычылык акциясына “Матраимов качкан жок”, “Матраимовду бошоткула!”, “Матраимовдой акчаны ким төлөдү?” “Американын агенттери кыргыз патриотун каматты”, "386 миллион долларды уурдаган Сапар Исаковду ким качырды?", "Кулматов эмнеге камалбайт?" деген жазууларды көтөрүп чыгышты.

18-февралда Бажы кызматынын төрагасынын мурдагы орун басары Райымбек Матраимов кармалганын Улуттук коопсуздук мамлекеттик комитетинин басма сөз кызматынан кабарлашкан.

Мекеменин маалыматына ылайык, Матраимов кылмыштуу кирешелерди адалдоо фактысы боюнча козголгон кылмыш ишинин алкагында кармалган.

Автор: Жылдыз Джускембаева