Депутат референдум тууралуу долбооруна тийиштүү комитетте ким кандай добуш бергенин ачык чыгаруу керектигин айтты

Бүгүн, 10-мартта Жогорку Кеңештин жыйынында референдум жөнүндө маселе каралып жатат.

Анда депутат Рыскелди Момбеков Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти боюнча комитеттин чечимин көрбөгөнүн айтты. Ал кайсы депутаттар добуш бергенин сурады.

Комитеттин төрагасы Канат Керезбеков добуш берүү сурамжылоо негизде өткөнүн белгиледи. "Эки сунуш түштү. 6 фракциянын сунуштары келип түштү. Сунуштар сурамжылоо жолу менен кабыл алынды", - деди ал.

Момбеков: "Комитеттин 17 мүчөсү бар. Кимдер каршы, кимдер колдоду? Жашырбай көрсөтүп койбойсуздарбы", - дейт.

Ошону менен катар эле депутат КСДПнын жыйыны болгонун билбей турганын белгиледи.

КСДП фракциясынын лидери Иса Өмүркулов жыйын сурамжылоо менен болгонун айтты.

Момбеков жыйынга ал чакырылбаганын эскертти.

Автор: Жылдыз Джускембаева