"Тёплые ключи" санаториясында скотчтолуп, асылган абалда табылган маркумга дагы бир экспертиза дайындалды

Чүйдүн Аламүдүн районуна караштуу "Тёплые ключи" санаториясында колу-буту байланып, оозу скотчтолуп бакта асылып турган абалда табылган маркумга дагы бир экспертиза дайындалды. Бул тууралуу SUPER.KG порталына Чүй ОИИББинин маалымат кызматынан билдиришти.

Маалыматка ылайык, учурда тергөө иштери бүтө элек. Буга чейин дайындалган соттук-медициналык экспертизадан сырткары, комиссиялык экспертиза дайындалды.

"Жыйынтыгы чыгаары менен толук маалымат беребиз", - деп билдирди басма сөз кызматынан Назира Имангазиева.

Окуянын чоо-жайы:

2020-жылдын 21-ноябрында болжол менен саат 13:13тө Аламүдүн РИИБинин нөөмөт бөлүмүнө "Тёплые ключи" санаториясында жансыз дене жаткандыгы тууралуу маалымат келип түшкөн. Ыкчам тергөө тобу аталган жерге барып, колу менен буту байланып, оозу скотчтолгон абалда бакта асылып турган жаранды аныкташкан.

Бул факты 130-берене ("адам өлтүрүү") менен Кылмыштардын жана жоруктардын бирдиктүү реестрине катталып, тиешелүү экспертизалар дайындалган.

SUPER.KG порталы маркум бала туулуп өскөн Кочкор районуна барып, ата-энесинен окуя тууралуу маалымат алган.

Кийин маркум баланын атасы Өмүрбек Жумабаев соттук-медициналык экспертизанын алдын ала жыйынтыгы суицид деп чыкты деп билдирген. Ал эми бул маалыматты ИИМ четке каккан.

Автор: Гүлзина Каныбекова