Гезиттердин бирине берген маеги үчүн Бишкек шаардык кеңешке талапкерлигин коюп жаткан ырчы Анжеликага эскертүү берилди

Бишкек шаардык кеңешке депутаттыкка талапкерлигин коюп жаткан ырчы Анжеликага эскертүү берилди. Бул тууралуу SUPER.KG порталына Бишкек аймактык шайлоо комиссиясынын төрагасы Кайрат Маматов билдирди.

Анын айтымында, ырчы Анжелика 1-март күнү үгүт иштери баштала электе "Де-Факто" гезитине интервью берген, анда шайлоо тууралуу дагы кеп болгон. Ал эми аталган маек 12-март күнү чыккан.

"Биз ырчы Анжелика шайлоого аттанып жаткан партиянын өкүлү менен жолугуп, бул тууралуу талкууладык, натыйжада ырчыга карата кагаз түрүндө эскертүү берилди. Аталган гезит менен дагы иш алып баруудабыз, алар өздөрү дагы тастыктады", - деп билдирди Маматов.

"Жергиликтүү кеңештердин депутаттарын шайлоо жөнүндө" мыйзамынын 23-бөлүмүнө ылайык, "Шайлоо алдындагы үгүт иштери бардык талапкерлердин тизмеси толук катталгандан тартып башталат".

Эске салсак, буга чейин ырчы Анжелика үгүт иштери башталганга чейин өзүнүн Инстаграм баракчасында түз эфир кылып, катталуучулар арасында батир утушка коюп, ойноткону шайлоочуларды сатып алуу катары бааланган болчу.

Бишкек аймактык шайлоо комиссиясынан бул маалыматты текшерүү үчүн атайын топ түзүлүп, бирок жыйынтыгы дагы деле чыга электигин билдирди.

Автор: Гүлзина Каныбекова