Мамлекеттик бажы кызматынын төрагасынын мурдагы орун басары Райымбек Матраимов "Бикард" клиникасына жаткырылгандан кийин 47-түзөтүү колониясына которулду. Бул тууралуу УКМКнын басма сөз кызматынан билдиришти.
Эскерте кетсек, 18-февралда Бажы кызматынын төрагасынын мурдагы орун басары Райымбек Матраимов кармалганын Улуттук коопсуздук мамлекеттик комитетинин басма сөз кызматынан кабарлашкан.
Мекеменин маалыматына ылайык, Матраимов кылмыштуу кирешелерди адалдоо фактысы боюнча козголгон кылмыш ишинин алкагында кармалган. 20-февралда Биринчи Май райондук сотунда анын баш коргоо чарасы каралып, эки айга камакта калтырылган.