Жалал-Абадда көчөлөрдү коопсуз шаарга ылайыкташтыруу башталды

Жалал-Абад шаарындагы көчөлөрдү коопсуз шаар долбооруна ылайыкташтыруу башталды. Бул тууралуу Жалал-Абад шаардык мэриясынын басма сөз кызматынан кабарлашты.

"Жалал-Абад шаарында бүгүндөн тарта коопсуз шаар долбоорунун алкагында инженердик түйүндөрдү жана мамыларды орнотуу иштери башталды. Алгачкы иш Барпы-Сейил көчөсүндөгү кесилиште жүрүүдө. Мындагы жумуштар аяктаган соң калган 11 кесилиште да инженердик түйүндөр жана мамылар коюлат", - деп билдиришти басма сөз кызматынан.

Бул пландалган иштер апрель айынын аягына чейин бүткөрүлөт. Шаардык мэрия тарабынан көчөлөрдү коопсуз шаардын талабына ылайык келтирүү иштери аткарылат.

Автор: Азат Бейшенбеков