Кытайда жол кырсыгынан каза болгон кыргыз студентинин сөөгү өлкөгө алып келинди

Кытайда жол кырсыгынан каза болгон 22 жаштагы кыргыз студентинин сөөгү мекенине алып келинди. Бул тууралуу Тышкы иштер министрлигинин басма сөз кызматынан билдиришти.

Маалыматка ылайык, бүгүн, 23-апрель күнү эртең менен жол кырсыгынын кесепетинен каза болгон 1999-жылы туулган Бексултан Шадыкановдун сөөгү Кытайдан өлкөгө жеткирилип, андан ары жерге берүү үчүн туугандарына өткөрүп берилди.

"Кыргыз Республикасынын Пекиндеги элчилиги тарабынан тиешелүү консулдук-укуктук жардам, ошондой эле маркумдун сөөгүн өлкөгө жөнөтүүгө байланыштуу башка зарыл жардам көрсөтүлдү, ал процедура карантиндик чектөөлөр шартында жана түз эл аралык аба каттамдар болбогон учурда ишке ашырылды", - деп жазылат маалыматта.