Бишкектеги Өчпөс оттун жанынан гүлдөрдү үзгөндөр мас абалында кармалды

Бишкек шаарындагы Өчпөс оттун жанынан гүлдөрдү үзгөн жарандар кармалды. Бул тууралуу Свердлов райондук ички иштер башкармалыгынан билдиришти.

"20-апрелде М.Р. аттуу жаран 18-апрелде Өчпөс оттон алыс эмес жерде Жеңиш аянтында жоогазын гүлдөрүн жулуп алган белгисиз адамдарга чара көрүү өтүнүчү менен кайрылган. Мындан тышкары 19-апрель күнү саат 01:00 чамасында Свердлов РИИБинин нөөмөт бөлүмүнө Фрунзе жана Ибраимов көчөлөрүнүн кесилишине жакын жерде белгисиз адамдар тарабынан чалуу келип түшкөн. Анда А.Б аттуу жаранга күч колдонуп 4 миң сомдук уюлдук телефонун жана 750 сом өлчөмүндөгү акча каражатын алып, белгисиз тарапка качып кеткендигин билдиришкен", - деп жазылат билдирүүдө.

Бул факты Кылмыштардын жана жоруктардын бирдиктүү реестрине 201-берененин негизинде ("каракчылык") катталып, кылмышка шектүү катары 1997-жылы төрөлгөн К.А. жана 1994-жылы төрөлгөн А.С. аттуу жарандар мас абалында кармалган.

Свердлов райондук соту шектүүлөргө карата эки айлык мөөнөткө камакка алуу чечимин чыгарган. Учурда тергөө иштери уланып жатат.

Автор: Азат Бейшенбеков