Парламент комитетинде "Коопсуз шаар" долбоорундагы айып пулдун көлөмүн азайтуу демилгеси колдоо тапты

Парламент комитетинде "Коопсуз шаар" долбоорундагы айып пулдун көлөмүн азайтуу демилгеси колдоо тапты.

Жыйында баяндама жасаган ички иштер министринин орун басары Нурбек Абдиев мыйзам долбоору жол кыймылынын айрым эрежелерин бузгандыгы үчүн айып пулдун көлөмүн азайтуу максатында иштелип чыкканын белгиледи. Ага ылайык, айып пулдарды төмөндөтүү сунушталууда.

- Белгиленген ылдамдыктан 10 чакырым/сааттан ашык, бирок 20 чакырым/сааттан ашпаган транспорт каражаттарынын айдоочулары;

- Жол белгилеринде же жүрүү бөлүгүнүн белгилеринде көрсөтүлгөн, токтоочу сызыктын алдына токтоп турган жол кыймылынын эрежелерин сактабагандык, жол чыракка тыюу салган же жол кыймылынын көзөмөлдөөчүнүн жаӊсоосуна тыюу салган;

- Жол белгилеринин талаптарын сактабаганда, жүрүүчү бөлүктү белгилөө боюнча талаптарды аткарбаганда;

- Токтотуу же токтотуу эрежелерин бузуу;

- Келе жаткан тилкеге чыкпай маневр жасоонун эрежелерин бузуу.

"Эгерде айып пул салуу жөнүндө буйрук түшкөн күндөн тартып 15 күндүн ичинде төлөнсө, айып пулдун өлчөмү 70 пайызга кыскарат. Башкача айтканда, айып пулдун өлчөмү 1000 сомдун ордуна 300 сомду гана түзөт”, - деди Нурбек Абдиев.

Депутат Сайдулла Нышанов Бузуулар жөнүндө кодекс кабыл алынгандан бери жолдогу өлүм сындуу кырсыктар азайды, бирок элди кыйнап койгонун айтты. "Жолдогу коррупциялык жосундарга эл нааразы. Анын айынан бийликке жана президентке сөз тийгизип жатат. Мисалы, Ош-Бишкек жолу бизнеске айланып, Сосновкадагы тосмо базарга айланып калды. Жашырганда эмне, жыйналган акча жогору жактагыларга чейин келет. Аларды тезинен текшерип, күнөөсү барларды жумуштан бошотуш керек", - деди ал.

Ички иштер министринин орун басары Октябрь Урмамбетов жолдогу мыйзам бузуулардын баары көзөмөлдө болорун, коррупцияга аралашкандар жоопкерчиликке тартыларын билдирди. "Азыр "Коопсуз шаар" долбоорунун алкагында мерчемдүү жерлердин баарына видеокамералар орнотулууда. Мындай чаралар өзүнүн оң таасирин тийгизет деген ойдомун", - деп кошумчалады ал.

Автор: Жылдыз Джускембаева