30 күндөн ашты. Чычкан суусуна түшүп кеткен 61 жаштагы аялдын жансыз денеси табылды

Буга чейин Чычкан суусуна 1960-жылы туулган В.Д. аттуу аял түшүп кеткени маалымдалган. Бүгүн, 4-сентябрда аялдын жансыз денеси табылып, жакындарына өткөрүп берилди. Бул тууралуу ӨКМнын басма сөз кызматынан билдиришти.

Маалыматка ылайык, Токтогул районундагы Бишкек-Ош унаа жолунун 260-чакырымында (Эликти тилкеси) Чычкан суусунда аял кишинин жансыз денеси жаткандыгы тууралуу маалымат 102 кызматынан түшкөн.

Жерине Токтогул райондук №97 ӨКМдан 5 куткаруучу тартылып, маркумдун сөөгү суудан чыгарылып туугандарына өткөрүп берилди.

Белгилей кетсек, ал 2-август күнү Бишкек-Ош унаа жолунун 255-чакырымында (Мраморный тилкеси) Чычкан суусуна агып кеткен. Издөө иштери 20-августка чейин жүргүзүлүп, суу тартылганга чейин убактылуу токтотулган.

Автор: Жолдубек Качкынбаев
Фото: ӨКМ