Ысык-Көлдө кардиохирургия борбору ачылып, 7 жаштагы бейтапка алгачкы акысыз операция жасалды

Ысык-Көл облусунун Чолпон-Ата шаарындагы "Ден соолук" медициналык-реабилитациялык комплексинин базасында Инновациялык кардиохирургия борборунун ачылышы болду.

Саламаттыкты сактоо жана социалдык өнүктүрүү министрлигинин билдирүүсүнө ылайык, аталган борбордо 7 жаштагы жүрөк кемтиги бар балага биринчи акысыз операция жасалды.

Мекемеде эки бөлүм бар - кардиохирургиялык операция бөлүмү жана жандандыруу бөлүмү. Адистер бир жылда 50гө чейин операция жасоону пландап жатышат.

Эске салсак, ушул жылдын 19-мартында президент Садыр Жапаров "Ден соолук" комплексинде болуп, калктын сапаттуу медициналык кызмат алышы үчүн ыкчам тартипте капиталдык реконструкциялоону баштоону тапшырган.

Автор: Бактыгүл Момбекова
Фото: Саламаттыкты сактоо министрлиги