Борбор калаада кыргыз-түрк бизнес форуму болуп өттү

Бүгүн, 10-сентябрда Бишкек шаарында соода-экономикалык кызматташтык боюнча кыргыз-түрк өкмөттөр аралык комиссиясынын X кеңешмесинин алкагында кыргыз-түрк бизнес форуму болуп өттү. Бул тууралуу министрлер кабинетинин басма сөз кызматынан кабарлашты.

Маалыматка ылайык, ишкерлердин жолугушуусуна Улукбек Марипов жана Түркиянын вице-президенти Фуат Октай катышты.

Форумдун жүрүшүндө болжол менен 250 ата мекендик жана 90дон ашуун түрк компания өкүлдөрү энергетика, айыл чарба тармагына жана тоо-кен өнөр жайына инвестицияларды тартуу боюнча долбоорлорго тийиштүү маселелерди талкуулады.

Министрлер кабинетинин төрагасы Улукбек Марипов өз сөзүндө Түркия менен эки тараптуу мамилелерди чыңдоо үчүн максималдуу күч-аракетти жумшоого даяр экендигин билдирди жана инвесторлорду өлкөгө чакырып өттү.

Ал эми Түркиянын вице-президенти түрк тарап да эки тараптуу мамилелерди чыңдоого даяр жана биргелешкен долбоорлорду ишке ашырууда, көйгөйлүү маселелерди чечүүдө аталган форумдун маанилүүлүгүн белгиледи.