"Чабандын сөөгү табылды". Казакстанда миңден ашык кой өрттөнүп кетти (фото)

Коңшу Казакстандын Түркстан облусунда миңден ашуун кой өрттөнүп, чабандын сөөгү табылды. Бул тууралуу Казакстандын Өзгөчө кырдаалдар министрлигине таянуу менен жергиликтүү басылмалары жазышты.

Маалыматка ылайык, кырсык бүгүн, 31-январда болгон. Анда Байдибек районунун Алгабас айылынан 5 чакырым алыстыкта жайгашкан дыйкан чарбанын аймагындагы эки кабаттуу сарай өрттөнгөн. Сарайдын биринчи кабатында майда мал, экинчи кабатында чөп сакталган. Өрт өчүрүүчүлөр кырсык болгон жерге 40 мүнөттө жеткен.

Кырсыктын кесепетинен 1 миң 150 баш кой жана 150 тонна чөп күйүп кеткен. Ошол жерден чабандын сөөгү табылган.

Азыркы учурда өрттүн келип чыгуу себеби такталууда.

Автор: Азат Бейшенбеков