Министр Бообек Ажикеев ЖЭБдеги жарылуу эмнеден болгонун айтты

ӨКМ министри Бообек Ажикеев ЖЭБдеги авария боюнча өлкө башчы Садыр Жапаровго маалымат берип, жарылуунун себебин айтты.

Анын айтымында, жарылуунун себеби дагы да такталып жатат.

“Буга чейин 14-буу казанда жарылуу болду деп ойлоп жатканбыз. Алдын ала изилдөө боюнча газ же көмүр чаңы чогулуп, шахтада жарылуу болуптур. Буу казандардын баары таза, жарака кетип, тешилген жерлери байкалган жок”, - деди Ажикеев.

Буга чейин авария ЖЭБдин 14-буу казанында болгон деген божомол бар экенин энергетика министринин орун басары Насипбек Керимов айткан.

Эске салсак, 2-февралда түнкү саат үчтөр чамасында Бишкек Жылуулук электр борборунда авария болуп, беш киши жабыркаган. Алардын экөөсүнүн абалы өтө оор экени кабарланды.

ЖЭБдеги авариядан улам калаадагы мектеп жана бала бакчанын бардыгы 6-февралга чейин онлайн окууга өткөрүлүп, Бишкек ЖЭБнин аймагында аварияга байланыштуу өзгөчө кырдаал режими киргизилген.