Баткенде изделип жаткан 29 жаштагы аялдын сөөгү тоодон табылды

Баткен районунда изделип жаткан 29 жаштагы аялдын сөөгү табылды. Бул тууралуу Өзгөчө кырдаалдар министрлигинен билдиришти.

Маалыматка ылайык, бүгүн, 2-мартта Р. кызы Н аттуу майыптыгы бар аялды издөөгө ӨКМдин Баткен облусу боюнча башкармалыгынын Баткен район-шаардык бөлүмдөрүнөн жалпы 31 куткаруучу тартылган.

Натыйжада аталган жарандын сөөгү саат 16:12де Рават айылындагы тоо боорунан табылып, жакындарына өткөрүлүп берилди.

"Алгач жогоруда аты аталган аялдын жоголгондугу тууралуу маалымат 102 кызматына түшкөн. Ал Баткен районунун Ак-Татыр айылына баратып, айылдан ары жайгашкан Рават айылынан түшүп калган. Ички иштер бөлүмү тарабынан издөө иштери 3 күн бою жүргүзүлүп, кошумча күч катары ӨКМден жардам сурап кайрылышкан", - деп айтылат билдирүүдө.

Куткаруучулар Баткен районунун Рават, Ак-Татыр айылдарынын аралыгында, Баткен-Раззаков автоунаа жолунун эки тарабында издөө иштерин жүргүзүшкөн.

Автор: Каныкей Амантаева
Фото: ӨКМ