Баткен районунда майыптыгы бар 29 жаштагы аял изделүүдө

Баткен районунда майыптыгы бар 29 жаштагы аял изделүүдө. Бул тууралуу Өзгөчө кырдаалдар министрлигинен билдиришти.

Ага ылайык, ушул жылдын 27-февраль күнү 29 жаштагы Р кызы Н аттуу аял жоголгондугу тууралуу маалымат 102 кызматына түшкөн.

"Аталган жаран Баткен районунун Ак-Татыр айылына баратып, айылдан ары жайгашкан Рават айылынан түшүп калган. Ички иштер бөлүмү тарабынан издөө иштери 3 күн бою жүргүзүлүп, кошумча күч катары ӨКМден жардам сурап кайрылышкан", - деп айтылат анда.

Буга байланыштуу бүгүн, 2-мартта Баткен райондук өзгөчө кырдаалдар бөлүмүнүн №106 жана №31 Өрткө каршы куткаруу бөлүгүнөн 23 куткаруучу, Баткен шаардык өзгөчө кырдаалдар бөлүмүнүн №26 Өрткө каршы куткаруу бөлүгүнөн 8, жалпы 31 куткаруучу тартылды.

Учурда куткаруучулар Баткен районунун Рават, Ак-Татыр айылдарынын аралыгында, Баткен-Раззаков автоунаа жолунун эки тарабында издөө иштерин жүргүзүп жаткандыгы кабарланат.

Автор: Каныкей Амантаева