Бишкек шаардык соту Камчы Көлбаевдин апасынын соту боюнча билдирүү жасады

Бүгүн, 26-июлда Бишкек шаардык соту маркум кримтөбөл Камчы Көлбаевдин апасы Мая Алиеванын соттук отуруму боюнча маалымат берди. Анда айыпталуучулар жана алардын жактоочулары тарабынан соттук териштирүүлөр жасалма түрдө жылдырылып жаткандыгы белгиленген.

Маалымдалгандай, кылмыш иши Октябрь райондук сотуна 2024-жылдын 17-апрелинде келип түшкөн. Үч айдан бери каралып, айыпталуучуну камсыз кылуу боюнча бардык чаралар көрүлгөндүгү кошумчаланган.

Айта кетсек, Көлбаевдин апасы Мая Алиеванын соттук иши өзү жашаган батирде өттү. Ага "Кылмыштуу кирешелерди легалдаштыруу (адалдоо)" беренеси боюнча айып тагылууда.

Ал арада анын бир тууган иниси Жолдошбек Көлбаев апасына козголгон кылмыш иш боюнча президент Садыр Жапаровго, УКМКнын төрагасы Камчыбек Ташиевге жана Жогорку соттун төрагасы Замирбек Базарбаевге кайрылуу жолдоду. Видеокайрылуу адвокат Бактыбек Жумашевдин Facebook баракчасына жарыяланды.

Эске салсак, 4-октябрда УКМК Камчыбек Көлбаев атайын операция учурунда өлтүрүлгөнүн билдирген. Ошондон бери атайын кызмат ага жана жакындарына таандык делген мүлктөрдү аныктап, мамлекетке кайтаруу иштерин жүргүзүп келет.

Автор: Замира Ниязбекова