"Адашкан психикалык оорукчандар". Эдил Байсалов Парижден эмнеге кат жазды?

Бүгүн, 9-августта Министрлер кабинетинин төрагасынын орун басары Эдил Байсалов Фейсбук социалдык тармагына "Парижден кат" деп атаган билдирүүсүн жарыялады. Анда ал социалдык тармактардагы фейк жана дезинформация менен күрөшүүгө багытталган мыйзамдарды иштеп чыгып, аны тараткандарга чара көрүү керектигин билдирген.

Анын айтымында Кыргызстандык боксчу Мунарбек Сейитбек уулунун финалга чыккан беттешинен кийин куттуктоо билдирүүлөрүнүн ордуна фейк маалымалттарга толгон билдирүүлөрдү алган. Ошол замат чукул жыйын өткөрүшкөн.

"Франциядагы элчибиз Садык Шер Нияз “тез чогулуп сүйлөшөлү, акыбал начар, балдарды ачка калтырдынар деп жазып атышат” деп телефон чалып чогултту. Мен ошол замат Спорт департамент жетекчиси Айбек Абдымомуновго жана Улуттук Олимпиада комитети баш катчысы Кылыч Сарбагышевге чалып, эмне болуп атканын билгим келди.

Көрсө, кайсыл бирөөлөр Бишкектин муз сарайындагы мурдагы бир видеону чыгарып, ал жерде балбандарыбыз жерге отуруп тамактанып атышканын көргөзүп “мына Париждеги балдар” деп кабатырлангансып, байкуш элибизди дүрбөлөңгө салыптыр", - деп жазган ал.

Байсалов жалган билдирүү тараткандар Кыргызстанга доо кетирип жаткандыгын айтып, аларга мыйзамдуу чара көрүү мезгил талабы кендигин билдирди.

"Улутубуздун маанайын бузуп, жалганды таратуу жөн эле ээн ооздук эмес. “Жек көрүүчүлүктү козутуу” деген кылмыш жаза кодексиндеги эски статьяны кайра карап чыгууга убакыт келип жетти. Жетишет. Мындай өзүнүн ички дартын коомго жайгандарды жайына койбошубуз керек. Алар жашоосуна нааразы жана акылдан адашкан психикалык оорукчандар.

Атайылап фейк тараткандар менен катар, билип-билбей фейк тараткандарга дагы жоопкерчилик киргизебиз.

Кыргызда “ойносоң дагы ойлоп сүйлө”, “билбеген ишке мурдуңду тыкпа”, “оозуңа келгенди оттой бербе” деген орой, бирок туура сөздөр бар.

Мындай кыларга иши жок фейсбукта отургандарды биз моралдык жактан басышыбыз керек", - деп кошумчалаган.

Белгилей кетсек, социалдык тармактарда кыргыз балбандарынын мелдеш алдында тамактанып отурган видеосу тараган. Көпчүлүк интернет колдонуучулары муну Парижде тартылган видео экенин айтып, Олимпиада оюндарынын уюштурулушуна нааразы болууда. Ал эми Франциядагы элчи Садык Шер-Нияз бул кадрлар Азия чемпиондугунда тартылган эски видео экенин билдирди.

Автор: Замира Ниязбекова