Милиция көк бөрү оюнунда болгон окуя боюнча билдирүү жасады

Бишкектин четиндеги "Азамат" унаа базарынын жанындагы ипподромдо болгон окуя боюнча тергөөгө чейинки териштирүү иштери башталды. Бул тууралуу Ленин райондук ички иштер бөлүмүнөн кабарлашты.

Милициянын маалыматына ылайык, бүгүн, 12-мартта саат 10:00дө Нооруз майрамына карата уюшулган көк бөрү мелдеши башталган. Мелдештин жүрүшүндө Сокулуктун “Бөрүлү” командасы менен Оштун “Бүркүт” командасы кез келген. Оюн башталгандан 10-15 мүнөт өткөндө оюнчулардын бири кагылышуудан улам аттан кулап, эсин жоготкон.

"Оюн дароо токтотулуп, окуя болгон жерге "Тез жардам" кызматы чакырылган. Бирок, тилекке каршы, жабырлануучу 1980-жылы туулган С.М. ооруканага жетпей каза болгон", - деп билдиришти Ленин РИИБинен.

Буга чейин көк бөрү мелдешинде "Бөрүлү" командасынын капитаны Мирлан Сраждинов атаандашы менен кагылышып, ошол жерден каза болгону кабарланган.