АКШда Трампты коркуткан делип дагы бир адам кармалды

Федералдык иликтөө бюросунун агенттери АКШнын президенти Дональд Трампка жана Улуттук чалгындоо кызматынын башчысы Тулси Габбардга жасалган коркутуулар менен байланышы бар деген шек менен Жорджия штатынын жашоочусун кармады. Бул тууралуу чет элдик басылмалар жазышты.

"25 жаштагы Лилберн шаарынын Алиакбар Мохаммед Амин аттуу жашоочусу Тулси Габбардга, президентке жана Ак үйгө коркуткан билдирүүлөрдү жибергени үчүн камакка алынды", - деп билдирген ФИБдин Атланта шаары боюнча бөлүмү.

Маалыматта коркутуулардын чоо-жайы айтылган эмес, болгону тергөө иштери уланып жатканы гана кошумчаланган.

Буга чейин АКШнын Юстиция министрлиги Пенсильвания штатынын тургуну Трампты жана жогорку кызматтагыларды "өлтүрөм" деп коркутууга алганы үчүн кармалганын маалымдаган.

Автор: Кылымбек Бейшеев
Фото: Интернеттен алынды