Алмазбек Атамбаев кыргыз-кытай чек арасындагы окуяда каза тапкан Александр Барыкинди мамлекеттик сыйлыкка көрсөтүү боюнча тапшырма берди

Бүгүн, 24-январда КРнын Президенти Алмазбек Атамбаев мамлекеттик чек ара кызматынын башчысынын милдетин аткаруучу Райимберди Дүйшөнбиев менен жолугушуусунда кыргыз-кытай чек арасындагы окуяда каза тапкан Александр Барыкинди мамлекеттик сыйлыкка көрсөтүү боюнча тапшырма берди. Бул тууралуу президенттин басма сөз кызматы билдирди.

Жолугушууда Алмазбек Атамбаев кылмышкерлерди зыянсыздандыруу боюнча атайын операцияга катышкан чек арачыларга ыраазычылык билдирип, анын жүрүшүндө жеңил жаракат алган жоокердин тезирээк сакайып кетишин каалады.

Өлкө башчы чек ара кызматынын жоокерлеринин түзүлгөн кырдаалда тез чечим кабыл алып, өз милдеттерин так аткаргандыгы Кыргызстандын чек арачыларынын жогорку кесипкөйлүгүн далилдеп тургандыгын белгиледи.

Ошондой эле Ысык-Көл чек ара отрядынын Ак-Шыйрак заставасынан жоокерлер келгенге чейин мамлекеттик чек араны бузгандарга куралдуу каршылык көрсөтүп, экөөнү жок кылып, каза тапкан Александр Барыкинди мамлекеттик сыйлыкка көрсөтүү боюнча тапшырма берди. Мамлекет башчысы Александр Барыкиндин үй-бүлөсүнө жана жакындарына көңүл айтты.

Автор: Айпери Ганыжан кызы
Фото: АКИpress