Ошто мэр Айтмамат Кадырбаев шаардыктардын өтүнүчтөрүнүн негизинде 123 протокол түзгөн

Ош шаарынын мэри Айтмамат Кадырбаев кызматына киришкен алгачкы күндөрдөн баштап шаар тургундары менен өткөргөн жолугушууларынын учурунда шаардыктардын өтүнүчтөрүнүн негизинде 123 протоколдук тапшырма берген. Бул тууралуу бүгүн, 12-июнда мэриянын басма сөз кызматы билдирди.

Анда мэриянын уюштуруу иштери жана жергиликтүү өз алдынча башкаруу бөлүмүнүн башчысы Нуралы Курмантаевдин билдиргенине караганда, 1-июнга карата мэр Айтмамат Кадырбаевдин протоколдук тапшырмаларынын 60ы толук аткарылды.

Ошондой эле 46 протоколдук тапшырма көзөмөлгө алынып, аткаруу иштери жүргүзүлүп жатат. Ал эми жүйөлүү себептерден улам 9 протоколдук тапшырманын мөөнөтүн 2015-жылга узартуу каралууда. Алар негизинен каржы булактарын аныктоого байланышкан.

Протоколдук тапшырмалардын аткарылышы мэриянын уюштуруу иштери жана жергиликтүү өз алдынча башкаруу бөлүмү тарабынан көзөмөлгө алынган жана мэрге системдүү маалымат берилип турат.

Автор: Айсана Паизова