Ырчы Гүлзада Рыскулова “Толгонуу” аттуу арт-шоу концертин берди (фоторепортаж)

Бүгүн, 13-июнда Бишкектеги "Ала-Тоо" амфитеатрында этнорок жанрында ырдаган ырчы Гүлзада Рыскулова “Толгонуу” аттуу арт-шоу тартуулады. Саат 19:30га белгиленген концерт 20:20да көшөгөсүн ачты. Гүлзаданын күйөрмандары амфитеатрдын 60 пайызын гана ээледи.

2 саатка созулган концерт театрлаштырылган шоунун коштоосунда өткөрүлүп, бир нече музыкалык жанрлардагы ырлар Гүлзада Рыскулованын гана аткаруусунда жаңырып жатты. Бир образдан экинчи образга бат-баттан кубулган ырчы айым эстрада айдыңында жаңыдан популярдуу болуп келе жаткан ырлары менен күйөрмандарын жагымдуу маанайга бөлөдү. Арт-шоудогу ар бир нота, ар бир үн жандуу аткарылып, чыныгы гонг, этникалык жана заманбап музыкалык аспаптар менен коштолду. Бул концертке гитарист Денис Колючийдин рок тобу, “Ордо-сахна” фольклордук-этникалык театры, “Аура” жаз тобу жана Жалал-Абаддан ат арытып келишкен "Апалар" тобу катышып, ырчы менен бирге өнөрлөрүн тартуулашты.

Кызынын биринчи жеке концертине күбө болуп, маңдайы жарыла кубанып турган ырчынын атасы

Жетимиш Рыскулов сезимдери менен бөлүшүп өттү: “Мындан өткөн бактылуу күн, мындан өткөн сыймык жок болсо керек. Элдердин патриоттук духун көтөрүп мыкты концерт берди. Мен ушунчалык толкунданып, сүйүнүп турам. Кызымдын ушундай таланты бар экенине жакшы түшүнбөй жүрүптүрмүн. Бүгүн гана түшүнүп отурам. Буга чейин чыгармачылык тууралуу башка көз карашта болчумун. Эми кызыма мындан ары каалаганча иштеп, өнөрүңдү өркүндөтө бер дейт элем. Жүрөгү элим, жерим деп соккон чыгаан кыздардан болсун”.

КРнын Маданиятына эмгек сиңирген ишмер Анаш Кадырова: “Гүлзада бүгүн элди чогултуп талантын көрсөттү. Адамдарды, айрыкча жаштарды ууландырып келе жаткан батыштык элементтен чыгып, бул концертте кыргыздын нукуралуулугуна кайттык. Гүлзаданын бүгүнкү өзгөчөлүгү, жалгыз өзү 2 саат бою жандуу үн менен ырларды мыкты аткарды. Образдары укмуш, ар бир ырдын сөзүнүн элементине жараша кыймыл-аракет жасады. Элдер жеке концерт деп коюп ашар концерт берет эмеспи. Бул болсо чыныгы жеке концерт болду. Мен ойлойм, Гүлзада бийик диапазону менен дүйнөнү дүңгүрөтчү кыздардын бири”,- дейт.

Гүлзада Рыскулова, ырчы: “Бул менин биринчи жеке концертим болгондуктан, абдан толкундандым. Баары жакшы болду деп ойлойм. Анткени концертке болгон дитимди жумшадым. Бүгүнкү күндө этно агымы тренд болуп, чет элдиктерди кызыктырууда. Ар бир улуттун музыкасы башкалар үчүн кызыктуу. Ал эми биздин өлкөдө 1-2 жылдын аралыгында жаңы агымдын аралашканы популярдуу болуп келе жатат. Бул менин көптөгөн чет өлкөлүк фестивалдардан алган тажрыйбам”,- деген оюн билдирди.

Нурипа Шабданалиева, көрүүчү: “Мен Гүлзаданын концертин көрүү үчүн атайын Кеминден келдим. Кыздын үнү оригиналдуу, үй-бүлөбүз менен жактырабыз. Мындайча айтканда, кыргыздын Уитни Хьюстону. Концерттен эргүү алдым. Өнөрү ташкындай берсин”.