Ошто заманбап китепкана курулууда

16-июнда Ош технологиялык университетинде заманбап, эки кабаттуу китепкананын курулушу башталды. Бул тууралуу бүгүн, 17-июнда окуу жайдын басма сөз кызматы билдирди.

Ага окуу жайдын жетекчилиги, декандар жана окуу жайда эмгектенишкен ардагерлер катышышты. Алгач ОшТУнун ректору Абдыкадыр Абидов курулуштун долбоору тууралуу кенен маалымат берип: “Бизге мындай заманбап китепкана абдан зарыл. Анткени билимдин булагы китепканадан башталат. Кандай гана учур болбосун, биз билим алган студенттерге жакшы шарттарды түзүп берүүбүз зарыл”,- деди.

Андан соң каалоо-тилектер жазылган барак капсулага салынып, курулуштун пайдубалына коюлду. Ошондой эле ырым менен кан чыгарылып, куруучуларга жана меймандарга майрамдык дасторкон уюштурулду.

Эскерте кетсек, китепкана 2015-жылдын май айында колдонууга берилип, окуу жайдын китепканасы жаңы имаратка которулмакчы.

Автор: Айсана Паизова
Фото: ОшТУнун басма сөз кызматы