Аваз Акимов "Эми башка" ырына клип тарттырды

Бүгүн, 21-июнда ырчы Аваз Акимов "Эми башка" ырынын клибин музыка сүйүүчүлөрүнө тартуулап отурат.

"Клиптин режиссёру - Эламан Акбаев. 3 күндүн ичинде тартылды. Баш каармандын, тагыраак айтканда, менин сүйгөн кызымдын ролун Азиза Жолболдиева деген кыз ойноду. Ал буга чейин тасмаларда роль жаратып жүргөнгөбү, кыйынчылыктарды жаратпады. Ал эми ата-энемдин ролундагы кишилерди менеджерим өзү тапты. "Атамдын" бир аз жаш көрүнгөнү эле болбосо, экөө тең ойдогудай ойноп беришти.

Бул ырдын сөзү Акбар Кубанычбеков деген досума, обону өзүмө таандык. Обон мурунку сүйлөшкөн кызыма арналган. Жүрөктөн чыккан обон десем болот. Ошол учурдагы жан дүйнөмдөгү кайгыны обонго салгам. Бир күнү досума жолугуп, андан "ушул обонго ылайыктуу текст жазып бер" деп суранып калдым. Анын сүйлөшкөн кызына арнап чыгарган даяр ыры бар экен, ошону обонго салып көрдүк эле, жарашып калды. Жыйынтыгында эки башка жолго түшкөн жаштардын сезимин чагылдырган чыгарма жаралды",- дейт ырчы бул клиби тууралуу.