Ырчылар Назгүл Токтакунова менен Арсен жаңы чыгармада кыз-жигиттин образын жаратышты

Кыргыз эстрадасындагы коңур үндүү ырчы кыздардын бири Назгүл Токтакунова бүгүн, 21-июнда күйөрмандарына "Кусалык" аттуу ырынын клибин тартуулады. Кызыгы, бул жаңы чыгармада Назгүл менен Арсен кыз-жигиттин ролун аткарышкан.

Ырчынын айтымында, клиптин көпчүлүк бөлүгү Бишкек шаарында, ал эми кайсы бир кадрлар кереметтүү Ысык-Көл жээгинен тартылган. "Клиптин режиссёру - Мирлан Саткымбаев. Негизинен клипти сапаттуу тартууга болгон күчүбүздү жумшадык. Мындан улам тартуу иштерине бир жылдан ашык убактыбызды кетирдик.

Клипте эки гана каарман бар, мен жана Арсен. Клипке каарман тандоо учурунда Арсен жаныбызда болчу. Анан Арсенге "Жигиттин ролуна сен эле тартылып бербейсиңби?" десек, дароо макулдугун берди. Экөөбүз буга чейин да Арсендин клибинде чогуу роль жаратканбыз. Мындан улам биз тууралуу "экөө кыз-жигит экен" деген кептер да айтылган. Чынында, Арсен экөөбүз жакын достордонбуз. Чыгармачылык жактан дайыма бири-бирибизди колдоп келебиз",- дейт Назгүл Токтакунова жаңы чыгармасы тууралуу.