Баткенде айдалган кесек тоютту коромжусуз жыйноо жана аны коңшу мамлекетке чыгарбоо милдеттендирилди

Баткенде быйылкы жылы күндүн кургакчыл болгондугуна байланыштуу облустун аймагында айдалган кесек тоютту өз учурунда коромжусуз жыйнап алуу максатында өкмөттүн Баткен облусундагы өкүлүнүн буйругу кабыл алынды. Бул тууралуу бүгүн, 8-июлда өкүлчүлүктүн басма сөз кызматы билдирди.

Ага ылайык, райондук мамлекеттик администрациялардын башчылары жана Баткен, Кызыл-Кыя шаарларынын мэрлери облустун аймагында айдалган кесек тоютту өз учурунда коромжусуз жыйнап алуу менен ар бир малга түзүлгөн рациондук нормадан 10 пайызга жогору топтоону, оруп-жыйноо учурунда өрт коопсуздугуна каршы иштерди уюштурууга, кесек тоютту оруп-жыйноо жана топтоонун жүрүшү тууралуу маалыматты бир жумада 2 жолу облустук аймактык өнүктүрүү бөлүмүнө тапшырууга милдеттендирилди.

Ошондой эле Баткен облустук ички иштер башкармалыгына КРнын Мамлекеттик чек ара кызматынын Баткен аймагынын чек ара башкармалыгына, Түштүк-батыш бажысынын Баткен бажы башкаруу борборуна, Баткен облусунун аймагындагы кесек тоютту кошуна мамлекеттерге чыгарбоо үчүн чара көрүү тапшырмасы берилди.

Автор: Айсана Паизова