Испания. Бука кууган фестивалда өзүн өзү сүрөткө тарткан жаранга айып салынды

Испаниядагы Памплона шаарында 7-июлдан 14-июлга чейин Сан-Фермин фестивалы өткөрүлдү. Салтка айланган иш-чарада көчөдө букалар чуркап, ага миңдеген туристтер күбө болушту.

Фестивалдын алгачкы күндөрүндө 4 адам жаракат алган. Алардын ичинде "Букалар кууганда кантип сактануу керек?" деген китептин автору Билл Хиллманн да бар.

Коррида менен энсьерро - аталган өлкөдөгү белгилүү көңүл ачуучу жана киреше алып келүүчү майрамдардын бири. Памплонада 200 миңдей жашоочу бар, ал эми алардын фестиваль учурундагы көңүл ачуусун көрүү үчүн 3 миллионго чукул турист келет.

Фестивалда жыл сайын катышуучулар жаракат алышат. Мунун алдын алуу үчүн коопсуздук чаралары тууралуу маалымат берилет. Бул жолу айтылган эрежени бузган британдык турист 3 миң евро айып пул төлөйт. Ал артында бука кууп келе жатканына карабай өзүн өзү сүрөткө тартканы үчүн айыпталганы айтылды. Ошондой эле кооптуу кырдаалга карабай видеого тартууга аракет кылган жаранга да айып салынды. Бул тууралуу чет элдик басылмалар жазып чыгышты.

Автор: Айпери Ганыжан кызы
Фото: Интернеттен алынды