Сочи-2014: Олимпиаданын ачылыш аземинде ачылбай калып чуу жараткан шакекченин себеби аныкталды

Быйыл 7-февралда Орусиянын Сочи шаарында Кышкы Олимпиаданын ачылыш аземинде олимпиадалык 5 шакекченин биринин ачылбай калгандыгынын себеби аныкталды. Бул тууралуу бүгүн, 5-декабрда иш-чаранын сценарийинин автору Константин Эрнстке шилтеме берүү менен орусиялык басылмалар жазып чыгышты.

К.Эрнсттин айтымында, шакекченин ачылбагандыгына ирландиялык риггерлер (парашют техникасын тейлөөчү адистер) күнөөлүү. "Олимпиаданын ачылыш жана жабылыш аземдерине 2,5 жыл даярданганбыз. Даярдоо иштери жүрүп жатканда шакекчелер жакшынакай эле ачылып жаткан. Түнү ошол риггерлер шакекчени түшүрүп салышыптыр. Алар менин 5 күн бою уктабай жүргөндөгү абалымды көрүп, коркуп айтпай коюшуптур",- деди ал.

Маалыматтарга таянсак, бардык адистер Олимпиаданын ачылыш аземи эң жогорку деңгээлде өтүп, шакекченин ачылбай калгандыгы гана кемчилик экенин айтышкан. Интернет колдонуучулары болсо бул окуяны шылдыңга алышкан.