11 жыл бою дайынсыз жүргөн кыргызстандыкты кызы издеп, Красноярскиге алып кетүү аракетин көрүүдө

Буга чейин 11 жыл бою дайынсыз жүргөн кыргызстандык Муса Маматов Орусияда туруктуу үйү жок жашап келгенин SUPER.KG порталы жазган эле. Анын туугандарын табууга жардам сурап кайрылуу түшкөндөн кийин аталган жарандын 19 жаштагы кызы Аяна Красноярск шаарынан байланышка чыккан. Эми ал атасын таап, өзү жашаган шаарга алып кетүүгө аракеттерди көрүүдө. Бул тууралуу бүгүн, 8-январда Орусиянын Бурятия Республикасынын Улан-Удэ шаарындагы кыргыз диаспорасынын кеңешчиси Алымбек Абжамилов билдирди.

Анын айтымында, ошол кыз жакынкы күндөрү атасын издеп таап, алып кетерин билдирген. "Анткени ал март айында турмушка чыгат экен",- деди мекендеш.

Эскерте кетсек, өткөн жылдын ноябрь айында 11 жыл бою дайынсыз жүргөн кыргызстандык Маматов Муса Карабаевич тууралуу маалымат чыккан. Ал 1964-жылы 13-февралда туулган, апасы Оштун Жапалак айылында борбордук мечиттин артында жашайт. М.Маматовдун айтуусу боюнча, апасы Калбү 84 жашта. Биринчи аялынан 2 уулу жана экинчи аялынан 1 кызы бар. Уулдары Данияр 24 жашта, Орозбек 22 жашта, кызы Аяна 19 жашта.

Анын Бурятияда селсаяктар менен тентип жүргөндүгү да айтылган. Мекендештерибиз аны биринчи аялы менен сүйлөштүргөндө, ал айымды сөгүп, "кызымды тапмайынча мага чалба" деген. Учурда Муса Маматов кайда экени белгисиз.

Автор: Нургазы Аматов