Саламаттыкты сактоо министри Чүйдөгү ооруканалардын начар абалын көрүп, жетекчилерин сынга алды (фото)

Саламаттыкты сактоо министри Талантбек Батыралиев Чүй облусунун Таш-Дөбө айылындагы Улуттук фтизиатрия борборунун алдындагы Клиникалык оорукана жана Арчалы айылындагы Кургак учукка каршы балдар ооруканасына жумушчу иш сапары менен барып келди. Бул тууралуу бүгүн, 14-январда Саламаттыкты сактоо министрлигинин басма сөз кызматы билдирди.

Иш сапарынын жүрүшүндө министр аталган ооруканалардын абалын сынга алды. "Имараттардын айрым бөлүктөрү менчиктештирилип кеткен. Бул мекемелерге акыркы жылдардын ичинде донорлор тарабынан 19 миллион доллар бөлүнсө да, имараттардын абалы начар. Алар капиталдык оңдоого муктаж. Мунун баары ооруканалардын жетекчилигинин туура эмес иш алып барганынын айынан",- деди Батыралиев.

Автор: Нургазы Аматов
Фото: Саламаттыкты сактоо министрлигинин басма сөз кызматы