Жылнаама

8- Сентябрь 1952 -жылы куудул Келдибек Ниязов төрөлгөн

Куудул Келдибек Ниязов Нарын облусуна караштуу Нарын районунун Куланак айылында туулган. 1969-жылы Куланак айылындагы орто мектепти аяктап, 1972-жылы эки жылдык эстрадалык студиядан окуп, улуттук эстрада жанрынын негиз салуучусу Чоро Кожомжаров менен иштешкен. 1989-жылы Б.Бейшеналиева атындагы Кыргыз мамлекеттик искусство институтунун маданий массалык иштер боюнча факультетин аяктаган.

Келдибек Ниязов "Мыскыл жана тамаша" аттуу программанын алгачкы алып баруучусу жана уюштуруучусу болгон.

1969-жылдан Токтогул Сатылганов атындагы Кыргыз мамлекеттик филармониясында эмгектенип, эл артисттери Эстебес Турсуналиев, Токтосун Тыныбеков, Ашыраалы Айталиев, Тууганбай Абдиев, Замирбек Үсөнбаевдер менен республиканын аймагын чыгармачылык сапар менен кыдырган. Кыргыз эл куудулу Асанкул Шаршенов менен сахнада 30 жыл элдин эрмеги болуп, "Ооба, аксакал", "Чолпошка", "Мен даяр", "Жөн эле келдим" жана башка чыгармалары менен журтчулукка таанылышкан.

К.Ниязов Кыргыз ССР Жогорку Советинин грамотасы менен сыйланып, 1992-жылы "Кыргыз Республикасынын Эмгек сиңирген артисти" ардактуу наамына татыган. 2006-жылы "Бишкек шаарындагы Октябрь районунун ардактуу атуулу", 2008-жылы "Чүй облусунун Сокулук районунун ардактуу атуулу" наамдарын алган.