Жылнаама

6- Апрель 1971 -жылы Орусиялык ырчы Кирилл Андреев туулган

Орусиялык “Иванушки International” тобунун ырчысы Кирилл Андреев Москвада туулган. Москва шаарындагы №468-мектепте окуп, кийин Радиомеханикалык техникумду бүтүргөн. Армиядан келгенден кийин Слава Зайцевдин моделдер мектебинде окуп, модель болуп иштеген. Андан сырткары кикбоксинг менен да машыккан. АКШда фотомоделдердин мектебин бүтүрүп келген соң профессионалдык деңгээлге жетип, көптөгөн клип, жарнамалык роликтерге тартылган.

1995-жылы орусиялык продюсер Игорь Матвиенко “Иванушки International” аталышындагы топ түзүп, Кирилл Андреев топко алынган. Ошондон тартып Кирилл Андреев ырчы катары таанылган.

Андан сырткары Кирилл Андреев өзүн актёр катары да сынап көргөн. 2011-жылы Голливудда иштеген орус режиссёру Эркен Ялгашев "Пруха" аттуу тасмасына башкы ролду жаратуу үчүн чакырган. Анда Кирилл ийгиликсиз адамдын ролун жараткан.

Жеке жашоосу

Ырчы жубайы Лолита Аликулова менен 1999-жылы таанышып, баш кошкон. 2000-жылдын октябрь айында түгөйлөр уулдуу болушкан. Жубайы аэробика жана фитнес боюнча машыктыртуучу. Актёр өзү дагы спорт менен активдүү машыгат.