Жылнаама

29- Декабрь 1929 -жылы "Mercedes", "Maybach" компанияларынын негиздөөчүлөрүнүн бири, немис автоконструктору Вильгельм Майбах көз жумган

"Mercedes", "Maybach" компанияларынын негиздөөчүлөрүнүн бири, немис автоконструктору Вильгельм Майбах көз жумган. Ал 1846-жылы 9-февралда Хайльбронне шаарында жарык дүйнөгө келген. 11 жашында жетим калып, 2 жыл жакыр үй-бүлөнүн балдары үчүн баш калкалоочу жайда окуган. Ал жерде чиймечи жана конструктор кесибине ээ болгон. 15 жашында Ройтлинген шаарындагы машина куруучу ишканада техникалык билимин ала баштаган.

Ишкананын жетекчиси, немис инженери Готлиб Даймлер менен таанышып, чогуу иштешкен. 1900-жылга жакын Майбах австриялык ишкер Эмиль Еллинектин буюртмасы менен "Мерседес" унаасын куруп чыккан. Ал эми унаага Э.Еллинек өзүнүн кызынын ысымын ыйгарган.

9 жылдан кийин автоконструктор уулу Карл менен биргеликте "Майбахтын мотор куруусу" фирмасын негиздеген. Компания "Цеппелин" моторлорун чыгарып, кийинчирээк "люкс" классындагы автоунааларды чыгара баштаган. Унаалардын "Майбах" маркасы учурда "Daimler AG" компаниясына тийиштүү.