Жылнаама

20- Январь 2009 -жылы АКШнын 44-президенти Барак Обаманын инаугурациялык салтанаты болуп өткөн

АКШнын 44-президенти Барак Обаманын инаугурациялык салтанаты болуп өткөн. Барак Обама президент катары антты АКШ Конгрессинин имараты – Капитолийдин кире беришинде берген. Ант берүүдө Обама өзүнүн саясий кумири катары эсептеген Авраам Линкольн 1861-жылы ант бергенде пайдаланган Библияны колдонгон. Авраам Линколндун Библиясы андан бери Конгресстин китепканасында сакталып турган.

Линколн - Американынын 16-президенти. Бийликте 1861-жылдан 1865-жылы киши колдуу болгонуна чейин турган. Жарандык согушту жеңүү жана кулчулук практикасын токтотуу менен өлкөнүн биримдигин сактап калганы үчүн урматталат.

Анын үстүнө 2009-жыл Авраам Линколндун туулган күнүнүн 200 жылдыгы болгон. Ал да Обама өңдүү президенттикке келгенге чейин Иллинойс штатынан Конгресстин мүчөсү болгон.

Америка президентинин инагурациясы - бир күнгө созулган, АКШнын демократиялык духун жана океандын эки жээгинин ортосунда жашаган 300 миллион калкынын ар түрдүүлүгүн камтууга аракеттенген окуя болгон.

56-ирээт өткөн ант берүү же Барак Обаманын инагурациясы мындай салтанаттарда буга чейин катталган рекордорддун баарын басып өткөн. Ал коротулган акча жагынан эң кымбат, коопсуздук чаралары буга чейин болуп көрбөгөндөй күчөтүлгөн жана көрүүчүлөрүнүн саны да эң көп катталган салтанат болгон.