Жылнаама

21- Январь 1981 -жылы бразилиялык ырчы Мишель Тело туулган

Бразилиялык ырчы Мишель Тело Бразилиянын Медианейра шаарында туулган. Мишелдин ата-энеси чакан нан бышыруучу жайдын ээси болушкан. Үй-бүлөдө 3 бир тууган. Ырчы мектепте окуп жүргөндө музыкалык ийримге катышып, хордо ырдаган. Алгачкы жолу 1989-жылы гитаранын коштоосунда жалгыз ырдап чыккан. 10 жашында атасы ага аккордеон белек кылып, анда ойногонду Мишель бат эле өздөштүрүп кетет. Тело 16га чыкканда "Grupo Tradicao" тобуна кабыл алынып, ошондон кийин ырдоо чеберчилиги биротоло калыптанат.

"Бразилияда футболсуз жашоо кызыксыз" деген кепти далилдеген Мишель 2000-жылы "Avai" футбол командасына кирет. Улуттук лигада ойноп 11 гол киргизип, дароо эле сезондун бомбардири болгонго жетишкен. Бирок анын музыкага болгон сүйүүсү футболдон да күчтүү белем, ал кайра келип ырчылык жаатта топтогу карьерасын улантат. "Grupo Tradicao" тобу бразилиялыктарга гана таандык сертанежу жанрында мыкты ырдаган эң популярдуу топ болгон. Жогорудагы ири ийгиликтерден кийин Мишель жеке карьерасы менен кеткенге аракет кылат. 2008-жылы ырчы топтон кетип, 2009-жылы "Balada Sertaneja" аттуу студиялык альбому жарыкка чыгып, ырлары хит-параддардан түшпөй, радиодо эң көп угулган. Ошондой эле Мишель "Ai Se Eu Te Pego", "Bara-Bara" аттуу хит ырлардын аткаруучусу.