Жылнаама

12- Февраль 1910 -жылы кореялык ишкер, “Samsung” компаниясынын негиздөөчүсү И Бёң Чоль төрөлгөн

Кореялык бизнесмен, “Samsung” компаниясынын негиздөөчүсү И Бёң Чоль Кореянын Тэгу шаарында фермердин үй-бүлөсүндө төрөлгөн. Атасы каражат топтоп, уулун Токиодогу университетте окутууга бүт аракетин жумшаган. Окуусун аяктаган И Бёң Чоль жеке бизнес менен алек болууну чечет. Алгач күрүч тегирменин ишке киргизип, эки жылдан соң коңшу өлкөлөргө экспорттой баштаган. Ал эми 1938-жылы "Samsung Trading Company" аталышындагы азык-түлүк тармагындагы ишкана ачкан. “Самсунг” деген сөз "үч жылдыз" деген маанини билдирет. И Бёң Чоль "Үч жылдыз" деп үч эркек уулунун урматына атап койгон. Бирок 1950-жылы бизнеси күйүп кетип, бир жылдан соң кайра баарын жаңыдан баштаган.

Иштин көзүн билип калган И 1969-жылы япондор менен биргеликте "Самсунг Электроникс" ишканасын негиздеп, сыналгыларды чыгара баштаган. Убакыттын өтүшү менен жаңы түптөлгөн компания электрондук, тиричилик буюмдарын чыгарып, Кореяда гана эмес, эл аралык аренада да өз ордун ээлей баштаган.

Компаниянын уюлдук телефондору тууралуу айтсак, 2 сим-карталуу телефонду дал ушул компания чыгарган. Биринчи болуп күндүн энергиясы менен иштей турган телефонду да иштеп чыккан.

И Бёң Чоль 1987-жылы 19-ноябрда каза болгон.