Жылнаама

7- Апрель 1964 -жылы Жогорку Кеңештин депутаты Ирина Карамушкина туулган

Жогорку Кеңештин депутаты Ирина Карамушкина Чүй облусунун Сокулук районундагы Новопавловка айылында туулган.

Жогорку билимдүү. 1989-жылы Кыргыз мамлекеттик университетинин тарых факультетин бүтүргөн.

Эмгек ишмердүүлүгүн 1981-жылы Фрунзе (Бишкек) шаарындагы №26 мектепте улук пионер вожатый болуп иштөөдөн баштаган. Мектептин педагогикалык комитетинин жамааты тарабынан мугалимдердин комсомол уюмунун катчылыгына шайланган. 1991-жылдан тартып Бишкек шаарындагы №1 мектепте тарых мугалими, 1992-2000-жылдары директордун тарбия иштери боюнча орун басары болгон.

1995-жылы Кыргызстан Социал-демократиялык партиясынын катарына өткөн.

2002-жылы Бишкек шаарынын мэриясынын Билим берүү башкармалыгынын тарбия секторунда жетектөөчү адис, ал эми 2003-2007-жылдары Бишкек шаарынын мэриясынын билим берүү башкармалыгынын тарбия секторун жетектеген.

2004-жылы КСДПнын өкүлдүгү боюнча Бишкек шаардык кеңешине депутат болуп шайланган.

2007-2010-жылдары IV чакырылыштагы Кыргыз Республикасынын Жогорку Кеңешинин депутаты болгон.

2010-жылдын октябрь айында Кыргызстан Социал-демократиялык партиясынын тизмеси боюнча V чакырылыштагы Кыргыз Республикасынын Жогорку Кеңешинин депутаты болуп шайланган. Жогорку Кеңештин Коргоо жана коопсуздук боюнча комитетинин төрагасынын орун басары.

Ирина Карамушкинанын Мамлекеттик кызматтын III класстагы мамлекеттик кеңешчиси чени бар (2013-ж.). Ошондой эле Ирина Карамушкина Кыргыз Республикасынын президентинин 2011-жылдын 28-февралындагы Жарлыгы аркылуу “Даңк” медалы жана Кыргыз Республикасынын президентинин 2011-жылдын 4-апрелиндеги Жарлыгы менен “Апрель элдик революциясынын баатыры” атайын төш белгиси менен сыйланган.

2016-жылдын октябрь айында КСДП фракциясынан Кыянбек Сатыбалдиевдин ордуна Жогорку Кеңештин 6-чакырылышындагы депутаты болгон.