28- Май 1968 -жылы
Австралиялык ырчы, актриса Кайли Миноуг төрөлгөн
Австралиялык ырчы, актриса Кайли Миноуг Австралиянын Мельбурн шаарында төрөлгөн. Он жашка толгондо апасы эки кызын ээрчитип алып киного тартылууга сынакка алып барган. Сынакта Кайли тандалып алынып, "Салливандардын үй-бүлөсү" аттуу фильмге жетим кыздын ролуна ээ болгон. 18 жашында "Коңшулар" аттуу ошол учурдагы популярдуу болуп жаткан телесериалга тартылган. Жыйырма жашында Кайли беш сыйлыктын ээси болууга жетишип, "эң жаш актриса" деп табылган. Өзгөчө Жан Клод Вандамм менен тартылган "Көчө баатыры" жана "Мулен Руж" аттуу кинолор Кайлиге дүйнөлүк аброй алып келген.
1987-жылы Австралияда өткөн кайрымдуулук концертинде Кайли биринчи жолу сахнага "Lokomotion" деген ыр менен чыккан. Аталган ыр Кайлиге музыка дүйнөсүнүн эшигин ачкан. Анын 2000-жылы чыккан "Spinning Around" аттуу ыры дүйнөлүк популярдуулукка ээ болуп, ошол эле жылы Сиднейде өткөн олимпиадалык оюнда да ырдалган.