Жылнаама

14- Ноябрь 1963 -жылы “Dolce & Gabbana” брендинин ээлеринин бири Стефано Габбана туулган

Италиялык модельер, “Dolce & Gabbana” кийим маркасынын негиздөөчүлөрүнүн бири Стефано Габбана 1963-жылы 14-ноябрда Италиянын Милан шаарында төрөлгөн. Атасы Миландагы бай стилисттердин бири болгондуктан, Стефано бала чагында эле моданы кууп кийинчи. Кичинекей кезинде С.Габанна сүрөт тартуу өнөрүнө кызыгып, Италиядагы көркөм колледждин графика жана дизайн бөлүмүнө тапшырган. Ал окуп жатып, сүрөтчү болуп иштеп акча тапчы. Колледжди аяктаган соң Стефано креативдүү директор адистигине ээ болгон.

1982-жылы дизайнер Доменико Дольче менен Милан шаарында таанышат. Ал учурда экөө тең кийим тигүүчү ательелердин биринде дизайнердин жардамчысы болуп иштечи. Ошентип экөөнүн модага болгон көз караштары төп келип, биргеликте иштешүүнү чечишкен. Алсак, эки дизайнер тең “барокко”стилин жакшы көрүп, 60-жылдардагы Италия киносунун сүйүүчүлөрү болушкан. Стефано Габбана жана Доменико Дольче 1985-жылы айымдар, 1987-жылы эркектер үчүн даярдалган биринчи кийимдер топтомдорун тартуулашкан. Чыныгы ийгиликке Дольче менен Габбана 1990-жылдарда жетишкен. Алар дүйнөлүк мода тарыхында болуп көрбөгөн жаңы моделдерди жаратышкан. Алардын ичинен эң атактуулары: тыш кийимдин дагы ролун аткара алган кооз ич кийимдер, жылаңач денеге кийилчү костюмдар, жана атайын жыртылып, баалуу зергер таштар менен кооздолгон жинсы шымдар. Эки гений Сицилиянын салттарын бузушуп, жесир аялдардын кара кийимдерин укмуштуу кече көйнөктөрүнө айландырышкан. Кийимдерден тышкары көз айнек, сумка, бут кийим жана башка аксессуарлардын жаңы түрлөрүн жаратышкан. Ошондой эле аларга гана таандык бир катар өзгөчө атыр жыттарын чыгарышкан. Dolce&Gabbana фирмасынын жүздөрү болуп атактуу жылдыздар Николь Кидман, Мадонна ижана Деми Мур эсептелет. Аталган бренддин кийим-кечелери дүйнө жүзүндөгү бардык өлкөлөрдө сатылат.