Жылнаама

2- Март 1969 -жылы ИИМдин Баңгибизнес менен күрөшүү башкармалыгынын башчысынын орун басары полковник Анвар Алиев туулган

ИИМдин Баңгибизнес менен күрөшүү башкармалыгынын башчысынын орун басары полковник Анвар Алиев туулган. Анвар Алиев Кыргыздын биринчи генералы Эргеш Алиевдин небереси болгон. Ал Ленинграддагы (азыркы Санкт-Петербург) Милициянын жогорку мектебин аяктаган. Көп жылдар бою түштүк аймакта милициянын жооптуу кызматтарында иштеп, үзүрлүү эмгеги үчүн мамлекеттик сыйлыктар менен сыйланган.

2008-жылдын 4-август күнү полковник А.Алиев кесиптештери менен футбол ойноп, түнкү саат 22:45 чамысында үйүнө бет алат. Унаасын токтотуп, өзү жашаган көп кабаттуу үйгө кирерде аны күтүп турган кылмышкер Макаров тапанчасынан ок чыгарган. Биринчи ок ийинин чийип өтүп, моюнуна тиет (болжол менен киллер артынан аткан). Жерге кулаган А.Алиев өзүн колу менен калкалагандан улам кийинки октор колун тешип өтүп, октун бири моюнуна, экинчиси ийинине тиет. Кылмышкер полковникке "контрольный" ок узатпай качып кеткен. Анвар Алиев андан кийин 1 сааттай тирүү болуп, ооруканада операция учурунда жан берген.

Полковник Анвар Алиевдин өлүмүн Бишкек шаарындагы Свердлов райондук соту 2009-жылдын 9-июнунда караган. Соттун өкүмүнүн жыйынтыгында “кылмышты уюштуруучу” деп Ош ШИИБинин Баңгибизнес менен күрөшүү бөлүмүнүн мурдагы башчысы Алмазбек Эргешбаев өмүр бою эркинен ажыртылган. “Анын жардамчылары” деп Ош ШИИБинин далил буюмдар сакталуучу жайынын кароолчусу Кахроман Исмаилов, Ош ШИИБинин Наркобизнес менен күрөшүүчү экинчи бөлүмүнүн мурдагы башчысы Шавкатбек Жунусов жана “куралчы” офицер, Ош ШИИБинин куралдар боюнча мурдагы инспектору Манол Тажибаевдер 25 жылга эркинен ажыратылган. Ал эми Анвар Алиевди өлтүргөн кылмыштын аткаруучусу дайынсыз бойдон калган.