Жылнаама

8- Март 1945 -жылы обончу жана аткаруучу Жеңишбек Шамшиев туулган

Обончу жана аткаруучу Жеңишбек Шамшиев Алайкуу өрөөнүндөгү Кызыл-Жар айылында кызматкердин үй-бүлөсүндө төрөлгөн. Ал 1961-жылы орто мектепти бүтүп, ошол эле жылы Кыргыз мамлекеттик университетинин экономикалык факультетине тапшырган. 1966-жылы университетти бүткөндөн кийин Алайкуу өрөөнүндөгү Сагындык атындагы совхоздо башкы экономист болуп эмгек жолун баштаган. 1972-жылы Алайкуу өрөөнүнөн райондук айыл чарба башкармалыгынын башкы экономисти болуп көтөрүлүп жана Райондук пландоо комиссиясынын төрагасы, “Кара-Кулжа” совхозунун башкы экономисти, “Совет” совхозунун партиялык комитетинин катчысы, Райондук мүлк фондусунун төрагасы, агрохимлабораториясынын башчысы болуп татыктуу эмгек сиӊирген.

Жеңишбек Шамшиев Кыргыз Эл акыны Сооронбай Жусуев, акындар М.Аматов, Ж.Мамытов, М.Алыбаев, Б.Абакиров, К.Ташбаев, К.Артыкбаев, А.Жакынбеков, Э.Ибраев ж.б. акындардын ырларына обон чыгарган. Көпчүлүк обондорунун сөзү өзүнүн калемине таандык.

Ж.Шамшиев иши менен талантын бирге алып жүргөн инсан болгондуктан, таланттуу инсандын эмгеги бааланбай калган эмес. Ал 1975-жылы Москва шаарында өткөн эл чыгармачылыгынын фестивалында лауреат, ”Эл чыгармачылыгына сиӊирген эмгеги үчүн" медаль жана бир нече I даражадагы дипломдордун ээси. Райондогу “Тоо булагы” этнографиялык ыр-бий ансамблинин алыска таанылышында да үлүшү чоң болгон. "Манас" эпосунун 1000 жылдыгына карата чыгарган “Манас гимни” аттуу хору райондук кароодо биринчи, областтык кароодо экинчи орун алган. Хорду Кара-Кулжадагы мектеп-интернатынын окуучулары аткарышкан. "Манас гимнинин" сөзү Ашым Жакыпбековдуку. Жеӊишбек Шамшиев 80ден ашуун обон чыгарган.

Ж.Шамшиев музыкалык көркөм өнөрүн өнүктүрүүгө сиӊирген эмгеги үчүн "Кыргыз Республикасынын Эмгек сиӊирген артисти" наамына 2003-жылы ээ болгон. Республиканын маданиятын жана көркөм өнөрүн өнүктүрүүгө кошкон зор салымы жана көп жылдык үзүрлүү эмгеги үчүн Кыргыз Республикасынын Ардак грамотасы менен 2011-жылы сыйланган. 2012-жылы катуу оорудан кийин 67 жашында дүйнө салган.