Жылнаама

9- Апрель 2013 -жылы "Мыйзамдагы ууру" атыккан Азиз Батукаев бошотулуп, Бишкек-Грозный чартердик каттамы менен Кыргызстандан учуп кеткен

Нарындагы №4-тергөө изоляторунун жетекчисинин орун басары Т.Абылгазиевдин сунушу менен Нарын шаарынын соту Ж.Эрматов 16 жылга эркинен ажыратылып соттолгон Азиз Батукаевди 8 жылдык өтөлө элек жаза мөөнөтүнөн бошотуу чечимин чыгарган. Судья Батукаевдин оор илдетке кабылганын негиз кылган. Бирок бошотууну суранып жаткан айыпкердин кылмышынын оор-жеңилине кароо керек деген мыйзам талабын көңүлдөн тыш калтырган.

А.Асанов, Д.Бегалиев, С.Узакбаев, К.Бектемиров жана тергөө изоляторунун дарыгери М.Кайкиевадан турган атайын медициналык комиссия "Батукаев ак кан жана боордун циррозуна чалдыккан" деген корутунду чыгарган. Дал ушул корутундунун негизинде 9-апрель күнү "мыйзамдагы ууру" атыккан Азиз Батукаев бошотулуп, Жаза аткаруу кызматы, Акыйкатчы институтунун өкүлдөрүнүн коштоосунда "Манас" аэропортуна чейин келип, Бишкек-Грозный чартердик каттамы менен Кыргызстандан учуп кеткен.