Жылнаама

30- Июль 1948 -жылы Француз актёру Жан Рено туулган

Белгилүү француз актёру Жан Рено (чын аты-жөнү Хуан Морено-и-Хедирик Хименес) Марокконун Касабланка шаарында төрөлгөн. Ал Париждеги чоң театралдык мектепти бүткөн. Актёр бардыгы болуп 60тан ашык тасмада тартылган. Жан Рено көптөгөн кино сыйлыктардан сырткары Франциянын эң бийик наамы деп эсептелген Легион Ардак Ордени менен сыйланган.

Чын аты айтып тургандай, ак сөөктөрдүн тукумунан чыккан дүйнөдөгү эң белгилүү француз актёру Жан Реного атактуулук режиссёр Люк Бессон менен таанышкандан кийин келген. Ал кезде Рено жапжаш болгон көчө актёру, ал эми Бессон режиссёрдун ассистенти эле. Эки талантты тагдыр тасма тартылуучу жерде кездештирген.

Бессондун бир нече тасмасына катары менен тартылган Жан Рено дүйнөнүн европалык бөлүгүнө бир топ таанымал болуп калат. Бирок, чыныгы популярдуулукту актёрго “Леон” тасмасы алып келгени чын. Так ушул фильм Жан Реного алыскы Голливудга жол ачкан. Анын Голливуддагы алгачкы тасмалары – “Аткарылгыс тапшырма”, “Годзилла”. Албетте, бул толук тизме эмес. Акыркы “Кызгылт суулар”, “Код Да Винчи” сыяктуу тасмалардан кийин Рено өзүнүн талантын далилдей алган. Актёрдун артыкчылыгы – ал мушташ же драма болобу, детектив же комедия болобу, айтор, бардык жанрдагы кинолорго тартыла бергендиги. Себеби ага ар убак бардык образдар жарашкан.